Jobcenterimi Københavnimiittumi kalaallit eqqumiitsuliaat Inuuteq Storch: “Selected from Keepers of the Ocean”
Eqqumiitsuliat Café b-mi Køge Landevej 43-miittumi takuneqarsinnaapput. Ataanilu eqqumiitsuliaq pillugu paasisaqarnerusinnaavutit.
Eqqumiitsuliaq pillugu
Eqqumiitsuliaq “Selected from Keepers of the Ocean”-mik qulequtserneqarsimavoq, tassanilu Inuuteq Storchip Kalaallit Nunaanni inuiaqatigiit nutaaliaasut assini “Keepers of The Ocean” -imi 2019-mi saqqummersunit toqqartukkani saqqummersippai. Uani Inuuteq Storchip nammineq illoqarfimmini, Sisimiuni, avatangiisini saqqummiuppai; qanigisai, ilaqutai, ikinngutini kinguaariinnilu assigiinngitsuni nalunngisani peqatigalugit nuannisarneri aammalu pinngortitami inuunini takutippai. Assitigut takuneqarsinnaavoq inuiaqatigiit imminnut qanilaartuusut aammalu inuit oqaluttuarisaanerat, siunissaat, nunarsuarmiooqataanermi politikkitigut inissisimaffik eqqumaffigilluarneqartoq.
Ulluinnarni assit
Assilissani kulturimi kodit atortullu Kalaallit Nunaanni qanoq ataqatigiilersinneqarsimanersut takuneqarsinnaavoq. Assit analogiupput, ulluinnarniillu qanillillugit assilipallataallutik ilaatigut aputini inuuneq, iluliat, umiarsuit nioqqutissanik assartuisut, qanigisallu peqatigalugit kulturi, illarneq qanilaarnerlu takuneqarsinnaallutik. Kalaallit Nunaata pinngortitaanik, illoqarfianik inuiaqatigiinnillu kusanartumik ilumoortumillu takutitsipput.
Jobcenterimut Københavnimiittumut immikkut ataqatigiissakkat
Eqqumiitsuliat Jobcenterimut Københavnimiittumut immikkut ataqatigiissagaapput, taamaattumik sammisat pineqartut Jobcenterimik atuisunut innuttaasuusunullu ersarissagaallutik. Iikkap aappaani assit eqqumaffigalugit “Café b”-p skiltiata nalaanut iliorarneqarsimapput, taassumalu nalaanut aamma asseq ilineqarsimavoq arnaq inuusuttoq pizzatortoq. Taamaaliornikkut jobcenterimi ulluinnaat eqqumiitsuliami takuneqarsinnaapput. Iikkap aappaaniippoq asserujussuaq, taannalu eqqumiitsuliortup illoqarfiata asserivaa, inuullu angissusaattut angissusiligaalluni, taamaattumik takunnittoq iseqqusutullusooq ippaa.
Eqqumiitsuliaq alakkaruk
Inuuteq Storchip eqqumiitsuliaa ”Selected from Keepers of the Ocean” Gammel Køge Landevej 43-mi Café b-p eqqaani alakkarneqarsinnaavoq.
Valby stationimit pisuinnarluni 1o minutsit missaanniippoq, matullu silatinnguanut bussit 1A aamma 4A ingerlasarput.
EQQUMIITSULIORTOQ PILLUGU
Inuuteq Storch (I. 1989) assit atorlugit eqqumiitsuliortuuvoq assiliisuulluni, Sisimiuni, Kalaallit Nunaanniittumi najugaqarlunilu sulivoq. Inuuteq Fatamorgana og International Center of Photography-mi New Yorkimiittumi assiliinermut ilinniarsimasuuvoq.
SULINIUT PILLUGU PAASISSUTISSAT
Eqqumiitsuliat pillugit suliniut Handleplan mod racisme, etnisk diskrimination og hadforbrydelser (kalaallisut: race tunngavigalugu nikassaaneq, inuiaassutsit tunngavigalugit immikkoortitsineq aammalu uumissuineq tunngavigalugu pinerlunniarnermut iliuuserineqartut) aningaasaliisuuvoq. Beskæftigelses- og Integrationsforvaltningen (kalaallisut: Sulinermut Akulerutsitsinermullu ingerlatsivik) innuttaasunut kalaallisut innuttaasunullu kalaallinik tunuliaqutalinnut immikkoortitsinerup pinaveersaartinneqarnissaanut suliniuteqarnissani kissaatigisimavaa. Eqqumiitsulianik Kalaallit Nunaannik takussutissartalinnik saqqummersitsiniarnermi kissaatigineqarpoq nuna pillugu alapernaannerulernissaq ilisimanninnerulernissaq aammalu ilisarsisinnaalernissaq ajunngitsumillu isiginnissinnaalernissaq.